वीरगंज, जेठ ३१
पर्साको सखुवा प्रसौनी गाउँपालिका–२ श्रीपुर बजारबाट प्रहरीले १२ जना जुवाडेलाई नगद रकमसहित पक्राउ गरेको छ । एक घरमा तास खेलिरहेको अवस्थामा उनीहरूलाई पक्राउ गरिएको जिल्ला प्रहरी कार्यालय पर्साले जनाएको छ ।
प्रहरीले जुवाको खालबाट ४१ हजार ३३५ रुपैयाँ नगद र पाँच बुक तास बरामद गरेको जनाएको छ । पक्राउ परेकाहरूको नाम र ठेगाना भने सार्वजनिक गरिएको छैन ।
पक्राउ गरिएका सबैलाई प्रहरी हिरासतमा राखेर कानुनी कारबाही प्रक्रिया अगाडि बढाइएको पर्साका प्रहरी नायब उपरीक्षक हरिबहादुर बस्नेतले जानकारी दिए ।
