वीरगञ्ज, ७ असार । १२औँ अन्तर्राष्ट्रिय योग दिवस २०२६ को अवसरमा भारत र नेपालबीचको गहिरो सांस्कृतिक एवं आध्यात्मिक सम्बन्धको प्रतीक मानिने वीरगञ्जस्थित प्रतिष्ठित शङ्कराचार्य गेटमा एक विशेष योग कार्यक्रम भव्य रूपमा सम्पन्न भएको छ । भारतको महावाणिज्य दूतावास, वीरगञ्जद्वारा “सद्भावका लागि योग” भन्ने मूल मर्मका साथ सो कार्यक्रमको आयोजना गरिएको हो ।
कार्यक्रममा मधेश प्रदेशका मुख्यमन्त्री कृष्ण प्रसाद यादव मुख्य अतिथिका रूपमा उपस्थित हुनुहुन्थ्यो । त्यस्तै, विशिष्ट अतिथिहरूमा मधेश प्रदेशका भूमि व्यवस्था, कृषि तथा सहकारी मन्त्री श्याम प्रसाद पटेल र वन तथा वातावरण मन्त्री शंकर प्रसाद चौधरी हुनुहुन्थ्यो ।
कार्यक्रममा सखुवा प्रसौनी गाउँपालिकाका अध्यक्ष जसवंत यादव, स्थानीय उद्योग वाणिज्य सङ्घका सदस्यहरू, नेपाल-भारत मैत्री सङ्घ (निफा), पतञ्जलि योग समिति (पर्सा एवं बारा) का पदाधिकारीहरू, प्रमुख जिल्ला अधिकारी, प्रहरी उपरीक्षकहरू लगायत स्थानीय सरकारी अधिकारी तथा विभिन्न क्षेत्रका नागरिकहरूको उत्साहजनक सहभागिता रहेको थियो ।
कार्यक्रमको विशेष आकर्षण योगका विद्यार्थीहरूद्वारा प्रस्तुत गरिएको उन्नत योगासनहरूको प्रदर्शन रहेको थियो । विद्यार्थीहरूले योग अभ्यासमा निहित अनुशासन, लचकता र सुन्दरतालाई कलात्मक रूपमा प्रदर्शन गरेका थिए, जसको उपस्थित गणमान्य व्यक्तित्व तथा सहभागीहरूले उच्च प्रशंसा गरेका थिए ।
कार्यक्रमलाई सम्बोधन गर्दै वीरगंजस्थित भारतका महावाणिज्य दूत देवी सहाय मीनाले योगलाई भारतको तर्फबाट विश्वका लागि दिइएको अनुपम उपहार भन्दै यसको सर्वव्यापी महत्त्वमाथि प्रकाश पार्नुभयो । उहाँले शारीरिक स्वास्थ्य, मानसिक स्पष्टता र सामाजिक सद्भाव बढाउन योगको भूमिका अतुलनीय रहेको बताउँदै योगले सीमाहरूभन्दा माथि उठेर भारत र नेपालबीच मित्रताको बलियो सेतु निर्माण गर्ने विश्वास व्यक्त गर्नुभयो ।
मुख्यमन्त्री कृष्ण प्रसाद यादवले अन्तर्राष्ट्रिय योग दिवस २०२६ को पूर्वसन्ध्यामा शृङ्खलाबद्ध रूपमा योग कार्यक्रमहरू आयोजना गरेकोमा भारतको महावाणिज्य दूतावास, वीरगञ्जको खुला हृदयले सराहना गर्नुभयो । यस्ता पहलहरूले समग्र जनस्वास्थ्यप्रति जनचेतना बढाउनुका साथै दुई देशबीचको गहिरो सांस्कृतिक र जनस्तरको सम्बन्धलाई थप मजबुत बनाएको उहाँले उल्लेख गर्नुभयो ।
मध्यरातमा भएको वर्षाका बाबजुद पनि बिहान सबेरै ठूलो सङ्ख्यामा योगप्रेमीहरू स्वास्थ्य, सद्भाव र समग्र कल्याणको उत्सव मनाउन शङ्कराचार्य गेटमा एकत्रित भएका थिए । यस आयोजनाले सीमापार एकता र दिगो जीवनशैलीलाई प्रवर्द्धन गर्न योगको शक्ति कति बलियो छ भन्ने कुरालाई पुनः प्रमाणित गरेको छ ।
भारतीय महावाणिज्य दूतावासले योगका फाइदाहरूबारे चेतना जगाउने र भारत-नेपाल मित्रतालाई अझ प्रगाढ बनाउने उद्देश्यका साथ सञ्चालन गरेको योग कार्यक्रमहरूको शृङ्खला आज प्रतिष्ठित शङ्कराचार्य गेटमा आयोजित मुख्य कार्यक्रमसँगै सफलतापूर्वक समापन भएको छ ।
