वीरगंज, असार २१ –
प्रतिपक्षी दल नेपाली कम्युनिष्ट पार्टी (नेकपा)का संयोजक एवं पूर्वप्रधानमन्त्री पुष्पकमल दाहाल ‘प्रचण्ड’ले वर्तमान सरकार संविधान र संघीय लोकतान्त्रिक गणतन्त्रलाई कमजोर पार्ने दिशामा अघि बढिरहेको आरोप लगाएका छन्।
आइतबार काठमाडौंमा नेकपा उपत्यका प्रदेश समितिले आयोजना गरेको कार्यक्रममा बोल्दै दाहालले सरकार सुशासन र विकासभन्दा पनि संविधानले सुनिश्चित गरेका अधिकारहरू कमजोर बनाउने उद्देश्यमा केन्द्रित रहेको दाबी गरे।
उनले महिला, दलित, आदिवासी तथा जनजातिले संविधानमार्फत प्राप्त गरेका अधिकार खोस्ने प्रयास भइरहेको आरोप लगाउँदै संविधान र संघीय लोकतान्त्रिक गणतन्त्रको रक्षाका लागि सबै लोकतन्त्रवादी शक्तिहरू एकजुट हुनुपर्ने आवश्यकता औँल्याए।
दाहालले वर्तमान परिस्थितिप्रति सचेत रहन आग्रह गर्दै संविधान र लोकतान्त्रिक उपलब्धिको संरक्षणका लागि नागरिक र राजनीतिक शक्तिहरू सक्रिय हुनुपर्ने बताएका छन्।
