बारा: अस्ट्रेलियाको नर्थन टेरिटोरीमा आयोजना हुने ‘एनटी टप एन्ड टी-२०’ सिरिजका लागि नेपाल क्रिकेट संघ (क्यान) ले १५ सदस्यीय नेपाली टोलीको घोषणा गरेको छ। क्यानले बाराका अनिल साहको कप्तानीमा टोली घोषणा गरेको हो।
क्यानले रोहित पौडेल, लेग स्पिनर सन्दीप लामिछाने र दीपेन्द्रसिंह ऐरीजस्ता पहिलो रोजाइका मुख्य खेलाडीहरूलाई यस भ्रमणका लागि विश्राम दिएको छ।
यस्तो छ १५ सदस्यीय नेपाली टोली: अनिल साह (कप्तान), कुशल भुर्तेल, कुशल मल्ल, लोकेश बम, तृतराज दास, मयन यादव, पवन शर्राफ, दीपक डुम्रे, राशिद खान, नारायण जोशी, आकाश चन्द, शाहब आलम, विपिन खत्री, युवराज खत्री र रिजन ढकाल।
अगस्ट २१ देखि ३० (भदौ ५ देखि १४) सम्म सञ्चालन हुने यस प्रतियोगितामा नेपालले लिग चरणअन्तर्गत कुल ६ वटा खेल खेल्ने तालिका रहेको छ।
नेपालको खेल तालिका:
अगस्ट २१: पहिलो खेल एनटी स्ट्राइकसँग
अगस्ट २२: बंगलादेश हाई–परफर्मेन्स टोलीसँग
अगस्ट २४: होबार्ट हुरिकेन्स एकेडेमीसँग
अगस्ट २६: एसीटी कोमेट्ससँग
अगस्ट २७: किङ्समेनसँग
अगस्ट २९: भिक्टोरियासँग
