वीरगंज, १७ असोज । अढाइ महीनादेखि बन्द रहेको सिम्रौनगढ नगर अस्पताल बिहीवारदेखि सञ्चालन गर्ने निर्णय गरिएको छ ।
करारका कर्मचारीहरुले म्याद थप र तलबभत्ताको माग गर्दै अढाइ महीनादेखि अस्पताल ठप्प पारेका थिए । जसको कारण बिरामीलाई निकै सास्ती भोग्नुपरेको थियो । आज बारा उद्योग वाणिज्य सङ्घ सिम्रौनगढले सिम्रौनगढ नगरपालिकामा तालाबन्दी गर्न खोजेपछि उपप्रमुख नजमु शेहरले भोलिदेखि अस्पताल सञ्चालन गर्ने निर्णय सुनाएकी थिइन् ।
गत शनिवार संघले तीन दिनभित्र अस्पताल सञ्चालनको माग गर्दै नगरप्रमुख किशोरीप्रसाद कलवारलाई ज्ञापनपत्र बुझाएको थियो । तीन दिनपछि पनि अस्पताल सञ्चालनमा नआएपछि बारा उद्योग वाणिज्य सङ्घ सिम्रौनगढले अध्यक्ष लालबाबु कुशवाहाको नेतृत्वमा गएको टोलीले नगरपालिकामा तालाबन्दी गर्न खोज्दा उपप्रमुख शेहरले भोलिदेखि अस्पताल सञ्चालन गर्ने बताएका थिए ।