बारा , भदौ २० –
बाराको जितपुरसिमरा उपमहानगरपालिका–१ बैजुरा पुलस्थित पूर्व–पश्चिम महेन्द्र राजमार्गमा टिपरको ठक्करबाट मोटरसाइकल चालकको मृत्यु भएको छ ।
शुक्रबार दिउँसो पथलैयाबाट निजगढतर्फ जाँदै गरेको ना.१ अ.यो. १३४ नम्बरको खाली टिपरले पिलुवाबाट पथलैयातर्फ आउँदै गरेको प्रदेश २–०३–०२२ प ९६४५ नम्बरको मोटरसाइकललाई ठक्कर दिएको प्रहरीले जनाएको छ ।
दुर्घटनामा जितपुरसिमरा–१६ डुमरवानाका ५२ वर्षीय देवबहादुर चौरेल गम्भीर घाइते भएका थिए । उनको बयोधा अस्पताल वीरगंजमा उपचारका क्रममा दिउँसो १२ः५० बजे मृत्यु भएको हो ।
प्रहरीले टिपर र मोटरसाइकल नियन्त्रणमा लिएको छ । फरार रहेका टिपर चालक धुर्वदेव हजरालाई दिउँसो २ः२० बजे नियन्त्रणमा लिई घटनाबारे थप अनुसन्धान भइरहेको प्रहरीले जनाएको छ ।
