रसुवा , भदौ २५ –
भदौ १० गते रसुवामा आएको भीषण बाढीले भोटेकोशी र त्रिशूली नदी किनारका बस्ती, सडक तथा पूर्वाधारमा ठूलो क्षति पुर्यायो। बाढीपछि हजारौँ नागरिक प्रभावित भए भने ठूलो संख्यामा मानिसको ज्यान गएको र धेरै अझै सम्पर्कविहीन रहेको सरकारी तथ्यांक छ।
सडक तथा पुलहरू बाढीले बगाएपछि प्रभावित क्षेत्रमा उद्धारका लागि हेलिकप्टर प्रमुख माध्यम बनेको थियो। प्रतिकूल मौसम र कठिन भौगोलिक अवस्थाबीच उद्धार उडानमा खटिएकी हेलिकप्टर क्याप्टेन प्रिया अधिकारीले रसुवामा १०० भन्दा बढी उद्धार उडान गरेको बताइएको छ।
अधिकारीका अनुसार उद्धारका क्रममा घाइते, वृद्धवृद्धा, बालबालिका तथा अलपत्र नागरिकलाई सुरक्षित स्थानमा पुर्याउन प्राथमिकता दिइएको थियो। विशेषगरी टिमुरे तथा नेपाल–तिब्बत सीमावर्ती क्षेत्रमा फसेका नागरिकको उद्धारका लागि उनको हेलिकप्टर निरन्तर परिचालन भएको थियो।
उद्धार उडानका क्रममा मौसम चुनौतीपूर्ण रहे पनि प्रभावित नागरिकलाई सुरक्षित स्थानमा पुर्याउनु आफ्नो मुख्य प्राथमिकता रहेको क्याप्टेन अधिकारीले बताएकी छन्। उनका अनुसार ककपिटबाट देखिने जोखिमभन्दा उद्धारको पर्खाइमा रहेका नागरिकको अवस्थाले आफूलाई उडानका लागि थप जिम्मेवार बनाएको थियो।
मिस नेपालको मञ्च हुँदै नेपाली आकाशमा हेलिकप्टर क्याप्टेनको जिम्मेवारी सम्हाल्दै आएकी अधिकारीको रसुवा बाढीपछिको उद्धार सक्रियता महिला पाइलटको व्यावसायिक भूमिकासँगै विपद् उद्धारमा नागरिक उड्डयन क्षेत्रको योगदानको उदाहरणका रूपमा देखिएको छ।
