रसुवा , असोज १ –
चिलिमे जलविद्युत् आयोजनाको टनेलबाट थप चार शव र एक मानव अंग फेला परेको छ ।
नेपाली सेनाका अनुसार मंगलबार टनेलको ‘ब्रेक थ्रु’ गरी अन्तिम किनारासम्म खोजी गर्ने क्रममा शव तथा मानव अंग फेला परेको हो । फेला परेका शव र मानव अंगलाई हेलिकप्टरमार्फत त्रिशूली ल्याइएको छ ।
यसअघि भदौ १५ गते पनि टनेलबाट एक शव र एक मानव अंग फेला परेको थियो । भदौ १० गतेको बाढीका बेला टनेलमा ६ जना फसेको अनुमान गरिएकोमा अझै एक जनाको खोजी भइरहेको चिलिमे आयोजनाले जनाएको छ ।
खोजी तथा उद्धारमा नेपाली सेना, भारतीय सेना, सशस्त्र प्रहरी, चिलिमे जलविद्युत् आयोजना र नेपाल विद्युत् प्राधिकरणसहितका निकाय परिचालित रहेका छन् ।
