पर्सा , असोज २६ –
पर्साको सखुवा प्रसौनी गाउँपालिकामा खाता सञ्चालन नहुँदा कर्मचारीको तलब–भत्ता वितरणदेखि विकास निर्माण र सामाजिक सुरक्षा भत्तासम्मका काम प्रभावित भएको भन्दै गाउँपालिका उपाध्यक्ष शर्मिला विष्टले अध्यक्षको ध्यानाकर्षण गराउनुभएको छ।
उपाध्यक्ष विष्टले जारी गरेको ध्यानाकर्षण पत्रअनुसार आर्थिक वर्ष २०८३/०८४ को बजेट गाउँसभाबाट पारित भइसके पनि आफूले चाहेको प्रमुख प्रशासकीय अधिकृत सरुवा भएर नआएसम्म खाता सञ्चालन नगर्ने अध्यक्षको अडानका कारण समस्या उत्पन्न भएको हो।
पत्रमा साउन महिनादेखि गाउँपालिकाका कर्मचारी, शिक्षक तथा जनप्रतिनिधिले तलब, भत्ता र सेवा–सुविधा नपाएको उल्लेख छ। यसैगरी वृद्धवृद्धा, विधवा, अपाङ्गता भएका व्यक्ति तथा अन्य सामाजिक सुरक्षा भत्ता लाभग्राहीसमेत प्रभावित भएको उपाध्यक्षको भनाइ छ।
खाता सञ्चालन नहुँदा गाउँपालिका र वडा तहका योजना तथा कार्यक्रम अघि बढ्न नसकेको, इन्धन अभावका कारण निःशुल्क घोषणा गरिएको एम्बुलेन्स सेवा पनि सञ्चालन हुन नसकेको पत्रमा उल्लेख छ। यसले शिक्षा र स्वास्थ्य क्षेत्रको सेवा प्रवाहमा समेत असर परेको आरोप लगाइएको छ।
उपाध्यक्ष विष्टले व्यक्तिगत रिसराग र हठ त्यागेर तत्काल खाता सञ्चालनको व्यवस्था मिलाउन अध्यक्षसँग आग्रह गर्नुभएको छ। उहाँले विकास निर्माण तथा गाउँपालिकाको दैनिक कामकाज सहज रूपमा अघि बढाउन पनि ध्यानाकर्षण गराउनुभएको छ।
नोट: समाचारमा उल्लेखित आरोप उपाध्यक्ष विष्टले जारी गरेको ध्यानाकर्षण पत्रमा आधारित छन्। अध्यक्षको प्रतिक्रिया उपलब्ध भए समाचारमा समावेश गर्न सकिन्छ।
