पर्सा असोज ३० –
नेपाल आयल निगमले पेट्रोल, डिजेल, मट्टितेल र खाना पकाउने एलपी ग्यासको मूल्य यथावत् राख्ने निर्णय गरेको छ।
इन्डियन आयल कर्पोरेसनबाट नयाँ खरिद मूल्य प्राप्त भए पनि चाडपर्व र उपभोक्ताको हितलाई ध्यानमा राख्दै हालकै मूल्य कायम राखिएको निगमले जनाएको छ।
निगमका अनुसार काठमाडौं, पोखरा र दिपायल क्षेत्रमा पेट्रोल, डिजेल तथा मट्टितेलको मूल्य प्रतिलिटर २०० रुपैयाँ छ। त्यस्तै, सुर्खेत र दाङमा १९९ रुपैयाँ तथा चारआली, विराटनगर, जनकपुर, अमलेखगञ्ज, भलवारी, नेपालगञ्ज, धनगढी र वीरगंज क्षेत्रमा प्रतिलिटर १९७ रुपैयाँ ५० पैसा कायम छ।
खाना पकाउने एलपी ग्यासको मूल्य पनि प्रतिसिलिन्डर २ हजार ६० रुपैयाँमै यथावत् राखिएको निगमले जनाएको छ।
