वीरगञ्ज- त्रिभुवन राजपथ अन्तर्गत पर्साको वीरगञ्जस्थित मितेरी पुलदेखि गण्डक चोकसम्मको करिब ८ किलोमिटर सडकको सीमा क्षेत्र खाली गर्ने कार्य सफलतापूर्वक सम्पन्न भएको छ। पहिलो चरणमा २०८३ वैशाख ६ र ७ गते तथा दोस्रो चरणमा २०८३ असार १८ देखि भदौ ३१ गतेसम्म सीमाक्षेत्र खाली गराइएको हो।
सडक विस्तारका क्रममा विद्युत्, खानेपानी तथा इन्टरनेट सेवा पटक-पटक अवरुद्ध हुँदा वीरगञ्जवासीले लामो समयसम्म भोग्नुपरेको दैनिक जीवनमा कठिनाइ र सास्तीप्रति दुःख व्यक्त गर्दै असहज अवस्थामा पनि स्थानीय बासिन्दाले देखाउनुभएको धैर्य, संयमता र सहयोगप्रति आभार प्रकट गरिएको छ।
सडक विस्तारको निर्माण प्रक्रिया अघि बढ्यो
पूर्वाधार विकास मन्त्रालयले सडक विस्तारका लागि दुई प्याकेजमा बोलपत्र आह्वान गरिसकेको छ:
-
पहिलो प्याकेज: मितेरी पुलदेखि घण्टाघरसम्म
-
दोस्रो प्याकेज: घण्टाघरदेखि गण्डक चोकसम्म दुवै प्याकेजका लागि २०८३ असोज ३० गते बोलपत्र आह्वान गरिएको हो।
योजनाका प्रमुख विशेषताहरू:
-
मुख्य बजार क्षेत्र (इदगाह चोकदेखि पावर हाउससम्म): सडकको बीच भागमा चार लेनको सडक निर्माण गरिनेछ, जसको दुवैतर्फ साइकल लेन र फराकिलो फुटपाथ हुनेछ।
-
बजार क्षेत्रबाहिर: सर्भिस लेनसहितको ६ लेनको सडक निर्माण गरिनेछ।
-
फुटपाथ: सडकका दुवै किनारमा दरबारमार्गमा जस्तै ग्रेनाइट ढुङ्गा बिछ्याएर आकर्षक फुटपाथ निर्माण गरिनेछ।
-
समयावधि: निर्माण कार्य सुरु भएको ३० महिनाभित्र सम्पन्न गर्ने लक्ष्य राखिएको छ।
वीरगञ्जलाई थप व्यवस्थित, सुरक्षित, आधुनिक र सुन्दर शहरका रूपमा विकास गर्ने दीर्घकालीन लक्ष्यसहित यो परियोजना अघि बढाइएको छ।
