वीरगंज , १० मिति –
पर्सा जिल्लाबाट निर्वाचित सांसदहरूले वीरगंजको समग्र विकास र समृद्धिका लागि आवश्यक कानुन निर्माण तथा नीतिगत पहलमा प्रतिबद्धता जनाएका छन्। वीरगञ्ज उद्योग वाणिज्य संघ को सभाहलमा आयोजित स्वागत तथा सम्मान कार्यक्रममा बोल्दै सांसदहरूले वीरगंज क्षेत्रको आर्थिक, औद्योगिक तथा पूर्वाधार विकासलाई प्राथमिकतामा राखेर काम गर्ने बताएका हुन्।
कार्यक्रममा वक्ताहरूले वीरगंज देशकै प्रमुख औद्योगिक तथा व्यापारिक केन्द्र भएकाले यहाँको विकासले समग्र राष्ट्रको आर्थिक उन्नतिमा महत्वपूर्ण योगदान पुग्ने धारणा व्यक्त गरे। सांसदहरूले विकासका लागि आवश्यक कानुन निर्माण, सरकारी कार्यालयबीच समन्वय तथा लगानीमैत्री वातावरण निर्माणमा पहल गर्ने प्रतिबद्धता जनाए।
उद्योग, व्यापार, पर्यटन, शिक्षा, स्वास्थ्य लगायतका क्षेत्रमा देखिएका समस्या समाधानका लागि आवश्यक कदम चाल्ने विषयमा पनि सांसदहरूले जोड दिएका थिए। कार्यक्रममा उद्योगी, व्यवसायी, समाजसेवी तथा विभिन्न संघ–संस्थाका प्रतिनिधिहरूको उपस्थिति रहेको थियो।
सहभागीहरूले वीरगंजलाई समृद्ध बनाउन सरकारी तथा निजी क्षेत्रबीच सहकार्य आवश्यक रहेकोमा जोड दिएका थिए। साथै स्थानीय तह, जिल्ला प्रशासन, सुरक्षा निकाय लगायत सरोकारवाला निकायबीच समन्वय बढाएर विकास निर्माणका कार्यलाई प्रभावकारी बनाउने विषयमा पनि छलफल भएको थियो।
कार्यक्रममा उपस्थित प्रतिनिधिहरूले नवनिर्वाचित जनप्रतिनिधिहरूलाई बधाई तथा सफल कार्यकालको शुभकामना दिएका थिए।
