पर्सा , असोज ७ –
नेपाली कांग्रेसले १५औँ महाधिवेशनअन्तर्गत आज देशभर पालिका तहको अधिवेशन गर्दैछ। कांग्रेसको आधिकारिक निर्वाचन कार्यतालिकाअनुसार असोज ७ गते गाउँ तथा नगरपालिकाको अधिवेशन गर्ने कार्यक्रम छ।
अधिवेशनबाट प्रत्येक पालिकामा सभापति, एक महिलासहित दुई उपसभापति, सचिव र सहसचिव गरी पाँच पदाधिकारी निर्वाचित हुने व्यवस्था छ। कोषाध्यक्ष भने सभापतिले निर्वाचित कार्यसमिति सदस्यबाट मनोनयन गर्ने प्रावधान छ।
यसअघि कांग्रेसले असोज ३ र ४ गते वडा अधिवेशन गरेको थियो। बाढी प्रभावित रसुवा, नुवाकोट र धादिङमा स्थानीय अवस्था हेरी अधिवेशन गर्ने व्यवस्था मिलाइएको कांग्रेसले जनाएको छ।
कांग्रेसको १५औँ महाधिवेशन असोज १६ देखि १९ गतेसम्म काठमाडौंमा गर्ने कार्यतालिका छ।
