सुनसरी/इलाम , असोज ७ –
प्रहरीले सुनसरी र इलामबाट गरी करिब दुई टन गाँजा बरामद गरेको छ।
सुनसरीको इटहरी उपमहानगरपालिका–२० तरहरास्थित कोशी लोकमार्गबाट बा.२ च ९५७३ नम्बरको एम्बुलेन्समा लुकाएर राखिएको ४५० किलो गाँजा बरामद भएको प्रहरीले जनाएको छ। असोज ६ गते राति जाँचका क्रममा एम्बुलेन्सभित्र १५ वटा पोकामा प्याक गरिएको गाँजा फेला परेको थियो।
यस्तै, इलाम नगरपालिका–९ भञ्ज्याङस्थित मेची राजमार्गबाट ना.४ ख ८९९६ नम्बरको ट्रकबाट १ हजार ५ सय ४ किलो ६ सय १० ग्राम गाँजा बरामद गरिएको छ।
ट्रकको फल्स बटममा ४१ वटा प्लास्टिकका बोरामा लुकाएर राखिएको अवस्थामा गाँजा फेला परेको प्रहरीले जनाएको छ।
दुवै घटनामा एम्बुलेन्स र ट्रक नियन्त्रणमा लिएर फरार चालकको खोजी तथा थप अनुसन्धान भइरहेको प्रहरीले जनाएको छ।
