पर्सा , असोज ७ –
मौसम विज्ञान विभागले शुक्रबारदेखि आइतबारसम्म देशका विभिन्न स्थानमा मेघगर्जन, चट्याङ र हावाहुरीसहित भारीदेखि अति भारी वर्षा हुने सम्भावना रहेको जनाएको छ।
विभागका अनुसार गण्डकी र लुम्बिनी प्रदेशका केही स्थानमा भारीदेखि अति भारी तथा एक–दुई स्थानमा अति भारी वर्षा हुनसक्नेछ। कोशी, बागमती, मधेश, कर्णाली र सुदूरपश्चिमका केही स्थानमा पनि भारीदेखि धेरै भारी वर्षाको सम्भावना छ।
वर्षाका कारण बाढी, पहिरो, गेग्रान बहाव, डुबान तथा सडक र हवाई यातायातमा अवरोध हुनसक्ने भएकाले उच्च सतर्कता अपनाउन विभागले आग्रह गरेको छ। पानी परिरहेका बेला र रातको समयमा राजमार्गमा यात्रा नगर्न तथा नदी–खोलानजिक र पहिरोको जोखिम भएका क्षेत्रमा विशेष सावधानी अपनाउन अनुरोध गरिएको छ।
हिमाली तथा ट्रेकिङ क्षेत्रमा जानेले मौसम सुधार नभएसम्म यात्रा स्थगित वा पुनर्विचार गर्न र सम्बन्धित निकायबाट जारी हुने मौसम तथा विपद्सम्बन्धी सूचना नियमित रूपमा हेर्न विभागले आग्रह गरेको छ।
