वीरगंज, १३ साउन/ श्रीसिया नदी प्रदूषित गर्ने उद्योगहरूलाई कारबाईस्वरूप वीरगंज महानगरपालिकाले शहरबाट सङ्कलन गरेको फोहर उद्योग परिसरमा फाल्न शुरू गरेको छ । आइतवार वीरगंज महानगरपालिकाले तीनवटा उद्योगका परिसरमा फोहर फालेको हो ।
महानगरले श्रीसिया नदीमा प्रदूषण नगर्न नदी छेउछाउका उद्योगहरूलाई पटकपटक चेतावनी दिंदा पनि बेवास्ता गरेपछि आज कारबाईस्वरूप उद्योग परिसरमा फोहर थुपारिएको हो ।
नगरप्रमुख राजेशमान सिंहको निर्देशनमा आइतवार वीरगंज महानगर–२१ परवानीपुरस्थित अरनिका प्रोसेसिङ उद्योग, सिद्धि टेक्सटाइल्स प्रालि र मरियम लेदर इन्डस्ट्रिजमा नौ ट्याक्टर फोहोर खसालेको वीरगंज महानगरको सरसफाइ व्यवस्थापन महाशाखाका प्रमुख सर्फुद्दीन मियाँले बताए ।
यस अघि वीरगंज महानगरले नदी प्रदूषित गर्ने उद्योगहरू सिल गर्ने तयारी गरेपछि नौवटा उद्योगका सञ्चालकहरूले महानगरपालिकामा पुगेर १५ दिनको समय माग्दै नदीमा प्रदूषण नगर्ने लिखितरूपमैं सामूहिक प्रतिबद्धता जनाएका थिए । तर प्रतिबद्धता जनाएको तीन महीना बितिसक्दा पनि नदीको प्रदूषण नरोकिएपछि बाध्य भएर आइतवार तीनवटा उद्योगमा महानगरले शहरबाट सङ्कलन गरेको फोहर थुपारेको नगरप्रमुख सिंहले बताए ।
उनले भने, “मैले पटकपटक श्रीसिया नदी प्रदूषित गर्ने उद्योगहरूको अनुगमन गरेर सचेत गराएँ । पाँचवटा उद्योगलाई तीन/तीन लाख जरिवाना पनि गराएँ । तर पनि श्रीसिया नदीको प्रदूषण रोकिएन । बाध्य भएर आज फोहर खसाल्न निर्देशन दिएको हुँ ।” उनले नदी प्रदूषित गर्ने उद्योगहरूले अझै नटेरे कडा कदम चाल्ने चेतावनी दिएका छन् ।