वीरगंज । नेपाली कांग्रेस छिपहरमाई गाउँपालिकाको सभापतिमा धुरेन्दर साह कानु सर्वसम्मत चयन भएका छन् । नेपाली कांग्रेसको १५औँ महाधिवेशनअन्तर्गत सम्पन्न दोस्रो गाउँपालिका अधिवेशनले कानुलाई सभापतिमा सर्वसम्मत चयन गरेको हो ।
अधिवेशनबाट उपसभापतिमा रबिन्द्र यादव र सचिवमा पप्पु कुमार यादव सर्वसम्मत चयन भएका छन् । सभापति, उपसभापति, सचिव र सहसचिवसहित २० सदस्यीय गाउँकार्यसमिति सर्वसम्मत रूपमा गठन गरिएको कांग्रेसले जनाएको छ ।
नेतृत्व चयनका क्रममा सहमति र सहकार्यलाई प्राथमिकता दिँदै नयाँ कार्यसमिति गठन गरिएको हो । सर्वसम्मत नेतृत्व चयन भएपछि गाउँपालिकाका सबै वडा तथा टोल तहसम्म संगठनलाई थप व्यवस्थित र सक्रिय बनाउने, कार्यकर्ताबीच समन्वय तथा सहकार्य मजबुत बनाउने र पार्टीका नीति तथा कार्यक्रमलाई स्थानीय तहसम्म प्रभावकारी रूपमा पुर्याउने अपेक्षा गरिएको छ ।
अधिवेशनको उद्घाटन नेपाली कांग्रेस पर्साका जिल्ला सहसचिव नवीन सिंहले गरेका थिए । कार्यक्रममा कांग्रेसका जिल्ला तथा स्थानीय तहका नेता, कार्यकर्ता, प्रतिनिधि तथा शुभेच्छुकहरूको सहभागिता रहेको थियो ।
