काठमाडौं,१० असोजःनेपाली राष्ट्रिय क्रिकेट टिमका पुर्वकप्तान विनोद दास मलेसिया क्रिकेट एसोसिएसनको चिफ अपरेटिङ अफिसर (सीओओ) बनेका छन् ।
बाराको कलैया निवासी दास मसेलिया क्रिकेट संघले एक महिनाअघि खोलेको सीओओको आवेदनमा छनोट भएका हुन् । ‘छनोट भएको खबर आएको छ । दुईपक्षीय हस्ताक्षर गर्न बाँकी छ। त्यसको लागि अर्को हप्तातिर जान्छु होला’ विनोदले भने ।
विनोद यसअघि नेपाल क्रिकेट संघ (क्यान) का क्रिकेट अपरेसन म्यानेजरको रुपमा कार्यरत थिए ।उक्त पदबाट अलग्गिएको जानकारी क्यानलाई गराइसकेको विनोदले बताए ।
नेपाली राष्ट्रिय टिमका पूर्व कप्तान दासले सन् २००० को दशकमा यू–१९ देखि सिनियर टिमसम्मको कप्तानी गरेका थिए । यस्तै उनले प्रशिक्षकको रुपमा यू–१९ पुरुष टिम र महिला सिनियर टिमको प्रशिक्षकको भूमिका निर्वाह गरिसकेका छन् ।
