पर्सा , कात्तिक ९ —
जनमत पार्टी पर्साले बडादसैँ, दीपावली तथा छठ पर्वको अवसरमा चियापान तथा शुभकामना आदानप्रदान कार्यक्रम आयोजना गरेको छ। कार्यक्रममा पार्टीमा प्रवेश गरेका नयाँ सदस्यहरूलाई स्वागत गर्नुका साथै पार्टीको दोस्रो महाधिवेशनबाट निर्वाचित पर्साका केन्द्रीय पदाधिकारी तथा केन्द्रीय कार्यकारिणी सदस्यहरूलाई सम्मान गरिएको छ।
जनमत पार्टी पर्साका जिल्ला अध्यक्ष ओमप्रकाश सर्राफको अध्यक्षतामा सम्पन्न कार्यक्रममा पार्टीका राष्ट्रिय उपाध्यक्ष माधव सिंह प्रमुख अतिथिका रूपमा उपस्थित थिए। कार्यक्रममा वीरगन्ज उद्योग वाणिज्य संघका अध्यक्ष हरि गौतम, जनता समाजवादी पार्टी (जसपा) नेपालका पर्सा जिल्ला अध्यक्ष रामनरेश यादव तथा मधेशवादी चिन्तक एवं समाजसेवी नागेन्द्र सिंहलगायतको सहभागिता थियो।
कार्यक्रममा जनमत पार्टीका केन्द्रीय कार्यकारिणी सदस्यहरू रम्भा मिश्र, विनय यादव, अनिता रौनियार, मालती कुशवाहा र राजूराज गिरीसहित विभिन्न पदाधिकारी, सामाजिक अभियन्ता, संघसंस्थाका प्रतिनिधि, सञ्चारकर्मी तथा पार्टीका नेता–कार्यकर्ताहरू सहभागी भएका थिए।
सामाजिक सद्भाव र एकतामा जोड
कार्यक्रममा वक्ताहरूले बडादसैँ, दीपावली तथा छठ पर्वको शुभकामना व्यक्त गर्दै सामाजिक सद्भाव, आपसी भाइचारा, एकता र सहकार्यलाई बलियो बनाउनुपर्नेमा जोड दिए। विभिन्न समुदायबीच पारस्परिक सम्मान र सहअस्तित्वको भावना कायम राख्दै पर्व मनाउन उनीहरूले आग्रह गरे।
त्यसैगरी, पार्टीको दोस्रो महाधिवेशनबाट केन्द्रीय पदाधिकारी तथा केन्द्रीय कार्यकारिणी सदस्यमा निर्वाचित पर्साका नेताहरूलाई सम्मान गरिएको थियो। वक्ताहरूले यसले पार्टीभित्र संगठनात्मक एकता र कार्यकर्ताको मनोबल बढाउने विश्वास व्यक्त गरे।
कार्यक्रममा मधेशको अधिकार, पहिचान, सामाजिक न्याय तथा आर्थिक र सामाजिक रूपान्तरणका मुद्दामा एकजुट भएर अघि बढ्नुपर्नेमा समेत जोड दिइएको थियो।
