वीरगंज, ७ चैत/ पर्साका प्रहरी उपरीक्षक कुमोध ढुङ्गेलले प्रहरीको कर्तव्य निर्वाह गर्ने बताएका छन् ।
जिल्ला प्रहरी कार्यालय पर्साको जिम्मेवारी सम्हालेको महीना दिनपछि बुधवार पत्रकारहरूसँग परिचयात्मक कार्यक्रम गरेका प्रउ ढुङ्गेलले पर्सामा तस्करी शून्यमा ल्याउने दाबी गरे । उनले तस्करीका कारण बद्नाम पर्सामा आफ्नो कार्यकालमा शून्यमा झार्ने र जिप्रका पर्सालाई बिचौलियामुक्त बनाउने दाबी पनि गरे ।
उनले कसैले पनि आफ्नो काम गराउन आउँदा बिचौलियामार्फत नआउन आग्रह गरे । पीडामा परेका जोसुकैलाई न्याय दिलाउने इमानदार प्रयास गर्ने उनले बताए । आफूले जिल्लाको कमान्ड सम्हालेदेखि सीमानाकाहरूको अनुगमन गरेको र यहाँ हुने विकृतिविरुद्ध अभियान चाल्ने बताए कानूनविपरीत कार्य गर्ने जो कोहीलाई पनि कानूनको दायरामा ल्याउने उनले बताए । उनले कार्यालयको सूचना प्रविधिलाई आफ्नो कार्यावधिमा चुस्तदुरुस्त पार्ने बताए ।