वीरगंज, २२ पुस । सिख समुदायले वीरगंजमा सिख पन्थका १०औं गुरुको अवतारको रूपमा चिनिने साहिब श्री गुरु गोविन्दको प्रकाश उत्सव अर्थात् गुरु गोविन्द जयन्ती मनाएको छ ।
पाँच दिन अघिदेखि बिहान भजनकीर्तनसहित प्रभातफेरी निकाली नगरपरिक्रमा गरी शुभारम्भ भएको प्रकाश उत्सव अन्तर्गत आज वीरगंजका सिख धर्मावलम्बीहरूले श्रीपुरस्थित गुरुद्वारामा विशेष समारोह आयोजन गरेका थिए । विभिन्न धर्म समुदायका अगुवाहरूलाई निमन्त्रण गरी गुरुद्वारा दर्शन गराइएको थियो ।
समारोहमा भजनकीर्तनपछि प्रसाद अर्थात् लङ्गर वितरण गरिएको गुरुद्वारा गुरुनानक सत्सङ्ग वीरगंजकी प्रधान रमिन्दर कौरले जानकारी गराइन् ।
यो दिवस हरेक वर्ष हर्षोल्लासका साथ मनाइँदै आएको वीरगंजका व्यवसायी एवं सामाजिक कार्यकर्ता सरदार जसपाल सिंहले बताए । वीरगंजमा करीब साढे चार सय र नेपालमा करीब नौ हजार सिख समुदाय जनसङ्ख्या रहेको छ ।