वीरगन्ज, १७ भदौः गोरखापत्र दैनिकका पूर्वमहाप्रबन्धक बसन्तप्रकाश उपाध्यायको आज निधन भएको छ ।
पर्साको वीरगन्ज महानगरपालिका–४ गहवामाई मन्दिर अगाडीको चौतारोमा उहाँ आज अचेत अवस्थामा भेटिनुभएको थियो । तनहुँको भानु नगरपालिका–१ भन्सारपुल घर भएका ५५ वर्षीय उपाध्यायलाई अचेत अवस्थामा देखेर स्थानीयले प्रहरीलाई खबर गरेका थिए ।
खबर पाउने बित्तिकै वडा प्रहरी कार्यालय विर्ताबाट खटिएको प्रहरी टोलीले उपाध्यायलाई उद्धार गरी उपचारका लागी नारायणी अस्पताल वीरगन्ज पु¥याएको जिल्ला प्रहरी कार्यालय पर्साका प्रवक्ता एवं प्रहरी नायब उपरीक्षक चक्रबहादुर मल्लले जानकारी दिनुभयो ।
“अचेत अवस्थामै उहाँलाई अस्पताल पु¥याएका थियौँ,” प्रवक्ता मल्लले भन्नुभयो, “चिकित्सकले उपाध्यायको निधन भइसकेको जानकारी गराए ।” उपाध्यायको शव नारायणी अस्पतालमै राखिएको र उहाँको परिवारका सदस्यहरुसँग सम्पर्क गर्ने प्रयास भइरहेको प्रवक्ता मल्लले जानकारी दिनुभयो ।
