वीरगंज, २९ वैशाख/ वीरगंज महानगरपालिकामा सञ्चालित सामुदायिक विद्यालयमध्ये आधारभूत तहमा सञ्चालित २७ वटा विद्यालयका प्रधानाध्यापकको सरुवा भएको छ । महानगर अन्तर्गतका सामुदायिक विद्यालयको शैक्षिक गुणस्तर बढाउन प्रधानाध्यापकहरूको जिम्मेवारी हेरफेर गरिएको हो ।
तर महानगरको शैक्षिक प्रशासन महाशाखाले शिक्षा समितिमार्फत प्रअहरूको सरुवा गरेकोमा कुन विद्यालयमा कसलाई पठाएको हो भन्नेबारेमा पूर्ण विवरणसहितको सूचना सार्वजनिक गरेको छैन । महानगर स्रोतका अनुसार सरुवाबाट शैक्षिक गुणस्तरमा सुधार हुने र नयाँ वातावरणमा राम्रो काम गरेर देखाउन प्रअ अभिप्रेरित हुने उद्देश्यले सरुवा गरिएको हो । केही दिनमैं सरुवा गरिएका प्रअहरूको चिठी विद्यालयमा जाने र रमाना लिएर नयाँ विद्यालयमा प्रअहरूलाई पठाउने तयारी भइरहेको जनाइएको छ । महानगरमा करीब ५५ वटा प्रावि विद्यालय छन् । जसमध्ये विभिन्न वडाका २७ वटा प्रावि विद्यालयका प्रअहरूको सरुवा गरिएको हो ।