काठमाडौँ । राष्ट्रियसभाको आजको बैठक कार्यसूचीमा प्रवेश नगरी स्थगित भएको छ ।
बैठकमा प्रमुख प्रतिपक्षी दल नेपाली काँग्रेसका सांसद्हरुले उठेर विरोध जनाए पछि बैठक कार्यसूचीमा प्रवेश नगरी स्थगित भएको हो ।
बैठकमा सभाका अध्यक्ष नारायणप्रसाद दाहालले नीति तथा कार्यक्रम माथि छलफल गर्नु पर्ने महत्वपूर्ण अवस्थामा सभालाई सहज रुपमा अगाडी बढाउन आग्रह गर्नुभयो ।
सभाका अध्यक्ष दाहालले जनआकाङ्क्षा र जन असन्तुष्टिलाई समेत ख्याल गरी प्राप्त उपलब्धी लाई संस्थागत गर्नु सबैको दायित्व भएको भन्दै सदनलाई निर्बाध रुपमा अगाडी बढाउनुपर्नेमा जोड दिनुभयो ।
सहकारी प्रकरणमा उपप्रधान तथा गृहमन्त्री रवि लामिछानेमाथि संसदीय छानबिन समिति गठनको माग गर्दै प्रमुख प्रतिपक्षी दल नेपाली काँग्रेसले सदन अवरुद्ध गर्दै आएको छ ।
राष्ट्रिय सभाको अर्को बैठक यही जेठ १३ गते आइतबार बिहान साढे ११ बजे बस्ने छ ।
आजको बैठकमा सरकारको आर्थिक वर्ष २०८१/०८२को नीति तथा कार्यक्रममाथि छलफल हुने कार्यसूची रहेको थियो ।
