वीरगंज, ७ कात्तिक/ श्रीर्सिया नदी प्रदूषण गरेको भन्दै वीरगंज महानगरपालिका–३२, चोर्नी स्थित नेपाल पेट्रो ल्युब इन्डस्ट्रिज प्रा.लि.मा स्थानीयले विरोध गर्दै एक कर्मचारीलाई कालो मोसो दलेका छन् । स्थानीयहरूको समूहले कम्पनी परिसरमा प्रवेश गरी प्रशासन शाखाका कर्मचारी काशीनाथ तिवारीमाथि दुव्र्यवहार गर्दै कालो मोसो दलेको प्रहरीले पुष्टि गरेको छ । स्थानीयवासीका अनुसार, कम्पनीबाट उत्पादन हुने ‘म्याक्सोल ल्युब्रिकेन्ट’को रासायनिक फोहोर बिना प्रशोधन सिधै नजिकैको नदीमा फ्यालिँदै आएको र यसका कारण सिर्सिया नदी प्रदूषित हुँदै गएपछि स्थानीयको स्वास्थ्यमा गम्भीर असर पर्न थालेको आरोप छ। छठ पर्वको तयारी चलिरहेका बेला नदीको पानी फोहोर हुँदा व्रतालुहरूलाई स्नान र पूजा गर्न कठिनाइ भएको भन्दै स्थानीयले आक्रोश व्यक्त गरेका थिए । स्थानीयहरूले विगत एक सातादेखि उद्योगबाट निस्कने फोहर रोक्न वा उद्योग नै बन्द गर्न माग गर्दै आएका थिए। तर माग बेवास्ता भएपछि शुक्रवार करिब ३०–४० जनाको समूह कम्पनीभित्र प्रवेश गरी हल्ला–हुल्लड र तोडफोड प्रयास गरेको जिल्ला प्रहरी कार्यालय पर्साले जनाएको छ। प्रहरीको टोली घटनास्थल पुगेर स्थिति नियन्त्रणमा लिएर थप अनुसन्धान अघि बढाइएको जिल्ला प्रहरी कार्यालय पर्साले जनाएको छ।