वीरगंज, ८ साउन । वीरगंज महानगरपालिकाको आयोजनामा श्रीसिया नदीमा बढ्दो प्रदूषण नियन्त्रणका लागि बिहीवार छलफल भएको छ। नगरप्रमुख राजेशमान सिंहको अध्यक्षतामा भएको छलफलमा खानेपानी मन्त्री प्रदीप यादवले नदी संरक्षण तथा प्रदूषण न्यूनीकरण गर्ने बताए । उनले श्रीसिया नदीको प्रदूषण समस्यालाई तत्काल नियन्त्रण गर्न र दीर्घकालीन समाधानका लागि योजनाबद्ध रूपमा अघि बढ्ने बताए । एशियाली विकास बैंकको ऋण सहयोगमा खानेपानी मन्त्रालयको सहलगानीमा आवश्यक बजेट विनियोजन गरी कार्य योजना निर्माण भइरहेको मन्त्री यादवले जानकारी दिए । मन्त्रालयबाट दीर्घकालीन योजना तयार पार्दै नदी संरक्षणका लागि अविलम्ब कार्यान्वयन शुरू गरिने बताए । नगरप्रमुख सिंहले वीरगंज महानगरपालिकाले प्रदूषण नियन्त्रणका प्रस्तावहरू तयारी अवस्थामा रहेको बताए । उनले संघीय सरकारसँग आवश्यक समन्वय र समर्थनको अपेक्षा गरे। कार्यक्रममा सरोकारवाला निकाय, वातावरणविद्, स्थानीय जनप्रतिनिधि तथा नागरिक समाजका अगुवा व्यक्तिहरूको सहभागिता थियो ।