वीरगंज, ८ साउन । जिल्ला समन्वय समिति पर्साका प्रमुख अजय सर्राफले पर्सा जिल्लामा २२ ओभरहेड ट्यांकी रहेकोमा त्यसमध्ये ५ वटामात्रै सञ्चालनमा रहेको बताएका छन् । सुक्खा र संकटग्रस्त मधेसको समस्या बुझ्न संघ सरकारले पठाएको अनुगमन टोलीले बिहीवार वीरगंजमा सरोकारवालाहरुसँग आयोजना गरेको छलफल कार्यक्रममा उनले पर्सागढी र पटेर्वासुगौली गाउँपालिका बाहेक अन्य १२ पालिकामा खानेपानी र कृषि सिंचाइको विकराल अवस्था रहेको जानकारी बताए । उनले गण्डक नहरको छेउका आधा दर्जन पालिकामा रोपाइँ भए पनि अन्य पालिकामा सहज ढंगले नभएको बताए । खडेरीले धानका बेर्ना सुकेको र खेतमा धाँजा फाट्न थालेको जानकारी गराए । छलफलमा जिल्ला समन्वय समिति बाराका प्रमुख नरेन्द्र साहले मधेसमा खडेरी र सुख्खाको समस्या भएको भन्दै ओवरहेड ट्यांकी निर्माणलाई प्राथमिकता दिइनुपर्ने बताए। बारा जिल्लाको पचरौता नगरपालिकाका मेयर जलन्धर सिंहले गण्डक नहरमा चैते धानबालीका लागि पनि भारतसँग पानी लिनु पर्ने सुझाव दिए । उनले गण्डक नहरको संरचना सुधारमा पनि जोड दिए । गरेको छ । उर्जा, जलस्रोत तथा सिंचाइ मन्त्रालयका सहसचिव सुशील आचार्य नेतृत्वको टोलीले बिहीवार पर्सा र बाराका सरोकारवालाहरूसँग छलफल गरेको हो । काठमाडौंबाट आएको अनुगमन टोलीका संयोजक तथा सहसचिव आचार्यले अधुरा खानेपानी तथा सिंचाइ आयोजनाहरू सञ्चालन हुनुपर्ने, ट्युवेलहरू पनि सञ्चालन हुनुपर्ने, गण्डक नहरमा पानी आउने तालिकामा परिवर्तन हुनुपर्ने, चुरे संरक्षण र चुरे क्षेत्रमा ठूला तलाउहरू निर्माण गरिनुपर्ने, विद्युत भोल्टेजको खराब अवस्थामा सुधार हुनु पर्ने जस्ता सुझावहरू आएको र सुझाव सङ्कलन गरी सात दिनभित्र अनुगमन टोलीले प्रतिवेदन सरकारलाई बुझाउने बताए । अनुगमन टोलीमा सिंचाइ व्यवस्थापन महाशाखाका उपनिर्देशक बासु तिमल्सेना, कृषि विभागका महानिर्देशक प्रकाशकुमार सञजेल, खानेपानी विभागका उपमहानिर्देशक बालमुकुन्द श्रेष्ठ लगायतका सहभागी थिए ।