वीरगंज । वीरगंजस्थित क्यासिनोमा नेपाली नागरिकलाई प्रवेश गराई जुवा खेलाएको आरोपमा सखुवाप्रसौनी गाउँपालिकाका अध्यक्ष जसवन्त यादव र इलाका प्रहरी कार्यालय पोखरियाका प्रहरी निरीक्षक प्रदीप पौडेलसहित आठ जना पक्राउ परेका छन् ।
जिल्ला प्रहरी कार्यालय पर्साका अनुसार वीरगंज महानगरपालिका–१४ गण्डकस्थित गोल्डेन फिंगर गेमिङ जोन प्रालिमा शुक्रबार राति छापा मार्दा जुवा खेलिरहेको अवस्थामा चार जना र नेपालीलाई क्यासिनो प्रवेश गराई जुवा खेलाएको आरोपमा चार जना कर्मचारी पक्राउ परेका हुन् ।
जुवा खेलिरहेको अवस्थामा पक्राउ पर्नेमा सखुवाप्रसौनी–६ का गाउँपालिका अध्यक्ष यादव, चन्दन सहनी, वीरगंज–११ का ओमप्रकाश बैठा र स्याङ्जाका प्रदीप पौडेल रहेका छन् । पौडेल इलाका प्रहरी कार्यालय पोखरियाका प्रहरी निरीक्षक हुन् ।
त्यस्तै क्यासिनोका कर्मचारी विजयकुमार पटेल, दिनेशकुमार पटेल, जयदेव साह र प्रदेशी साह पक्राउ परेका छन् । प्रदेशी साह भोजपुरी अभिनेता समेत हुन ।
प्रहरी प्रवक्ता डीएसपी चक्रबहादुर मल्लका अनुसार पक्राउ परेका सबैलाई जिल्ला प्रहरी कार्यालय पर्सामा राखेर घटनाबारे थप अनुसन्धान भइरहेको छ ।
